23-03-2026 | Safar Nama
Hii… kaise jaa rahe hai aapke din?
Dekho year ke 80 days toh nikal bhi gaye, lekin lagta hai jaise abhi bhi kitni saari cheeze incomplete reh gayi hai. Kabhi kabhi lagta hai time bhaag raha hai aur hum bas uske peeche peeche chal rahe hai.
Sach bolu toh mujhe aajkal har waqt neend hi aati hai. Subah 7 baje uthna toh bilkul pasand nahi hai mujhe… seriously, itni jaldi kaun uthta hai yaar! Lekin kya karein… office bhi jaana hota hai.
Kal raat bahot thak gayi thi, isliye aaj office jaane ka bilkul mann nahi tha.
Lekin phir bhi gayi… aur aaj main time par pahunch gayi.
Mummy ne tiffin mein aloo ki sabji aur 2 roti pack ki thi. Ramadan khatam hote hi ghar mein khane ki charcha phir se shuru ho gayi hai — din bhar khaao, piyo aur aish karo.
Waise mujhe mere pending roza bhi rakhne hai. Soch rahi hu jaldi rakh lu… lekin itni garmi mein nahi. Shayad baarish ke time araam se complete karungi.
Office pahunchi toh Eid ke baad khaali haath jaana thoda awkward lag raha tha. Kisi ne kuch kaha toh nahi, lekin ek bahot achhi cheez hui.
Pinky Ma’am ne mujhe “Eid Mubarak” kaha aur hug bhi kiya.
Us moment pe mujhe laga ki woh mujhe sach mein pasand karti hai, aur honestly mujhe bhi woh bahot achhi lagti hai.
Thoda guilt bhi feel hua ki main kuch le kar nahi aayi. Niyat thi lene ki… par time nahi mila. Isliye socha aaj shaam pakka kuch le lungi.
Aur suno…
Aaj humare boss ne sabko induction bhi diya.
Matlab Eid ka mood aur bhi special ho gaya.
Aaj 6 baje tak office mein hi rehna tha. Induction itna heavy tha ki mera energy level full down ho gaya.
Waise market bhi abhi down hai…
stocks ke price niche hai, investment ka best time hai.
Lekin kya karein… jeb mein paise hi nahi hai.
Shaam ko jab office se nikle toh honestly dimaag aur body dono thak gaye the.
Maine socha aaj West se ghar chali jaati hu, lekin waha jaakar pata chala bus hi nahi hai.
Auto ke paise the… phir bhi pata nahi kyun maine socha chal kar East jaati hu.
Kaafi chalne ke baad mujhe 332 bus mil gayi aur seat bhi.
Us moment pe dil se nikla — Alhamdulillah.
Jab bus JB Nagar pahunchne wali thi tab Adi ka call aaya.
Aur us time main bus mein proper beauty sleep le rahi thi.
Funny baat yeh hai ki kabhi kabhi main family ka phone bhi turant pick nahi karti, lekin uska call turant utha liya.
Usne poocha, “Kidhar hai?”
Maine bola “Bus mein.”
Phir usne kaha:
“Main Andheri mein car lekar aaya hu, aa jao.”
Us waqt mann mein bas ek hi thought aaya —
“Yeh pehle call kar leta toh main itna struggle nahi karti.”
Khair… main ghar pahunch gayi.
Ghar par lauki ki daal aur rice bane the… lekin khana bilkul thanda aur taste bhi ajeeb lag raha tha.
Phir maine Fawdi se request ki ki mere saath chale… mujhe office ke liye gift lena hai.
Hum market gaye aur maine 9 chocolate boxes liye — 110 rupay each.
Total 990 rupay kharcha.
But honestly… mujhe laga yeh dena banta hai.
Kyuki office mein mujhe respect, pyaar aur appreciation bahot mila hai.
Aur abhi toh mujhe 1 saal bhi nahi hua hai waha.
Isliye dil se bas ek hi baat nikli —
Alhamdulillah for everything.
Jo mila hai, woh bhi bahot hai… aur shayad usse bhi zyada.
— Safar Nama ✨🌙
No comments:
Post a Comment