26-03-2026 | Safar Nama 🌙
Hello… kya haal chaal?
Aaj ka din kaafi interesting raha. Abhi 10:17 p.m. ho gaye hai aur Abbu high volume par Iran-US aur Israel ki news sun rahe hai. Mujhe bas yahi lag raha tha ki abhi abhi unhone BP ki medicine li hai, phir bhi itni intense news dekhna shayad brain par effect karta hoga.anyways abb no words for him..
Ghar ka scene bhi apni jagah chal raha hai.
Abhi thodi der pehle khana hua, aur Fawdi bartan dho kar, sukhe kapde bahar se laakar rakh rahi thi. Usse kal interview dene jaana hai, isliye woh 2 minute ke liye mere paas aayi thi folder banana aur files transfer karna seekhne.
Abhi woh mere right side mein baithi hai, aur main bed ke corner mein. Woh ek badi patili jisme gande kapde bhare hai usko base bana kar baithi hai — Aur obviously… reels scroll karna start. 😅
Sab log ab rest mode mein hai, aakhir 10:30 p.m. ho gaye hai.
Aur meri baat karu meri…
Main toh zinda bhagi hui insaan hu.
Aaj bhi subah late ho gayi aur bhagte bhagte office pahunchi. Lekin Alhamdulillah late marking nahi lagi.
Subah subah hi mujhe alas aur neend aane lagi thi. Phir bhi somehow maine newspaper padha, list banayi aur apna kaam start kar diya.
Aaj ka din fast wala tha.
Tiffin mein mast pulao, grapes aur sev chuda tha. Aur sach bolu toh mujhe office ke fridge mein rakhe laddu khane ka bahot mann tha. 😄
Shaam ko nikalte waqt maine bol diya ki client toh mere ghar ke paas hi hai, toh sir ne mujhe documents de diye sign karwane ke liye.
Ab mujhe jaana hi pada… aur us moment par bas ek hi thought —
meri zubaan mujhe hamesha fasaa deti hai.
Us time mujhe bahot headache aur right eye mein migraine pain ho raha tha. Isliye directly client ke paas jaane ke bajaye main ghar aayi.
Ghar aakar maine 2 gulab jamun khaye, phir garam chai with extra salted butter.
Sach bolu toh yeh instant energy recipe hainote karlo. 😄
Phir main client ke ghar gayi.
Waha pahunch kar mujhe floor aur room number yaad hi nahi tha, aur address bhi properly nahi tha. Maine unke relative ko call kiya. Unhone bola 5th floor, lekin pehle mujhe unse cheque collect karna tha kyunki woh bahar jaa rahi thi.
Main waha daud kar gayi, cheque liya, phir wapas us building mein.
Us jagah ka vibe thoda alag tha. Har taraf log chal rahe the, aur kaafi log ja-namaz lekar jaa rahe the, kyunki Maghrib ka time ho gaya tha. Sab masjid ki taraf namaz ke liye ja rahe the, aur main client office time se pahunchne ke liye bhaag rahi thi.
Lift bhi kaafi luxury wali thi — golden mirror lift.
Usme khadi ho kar main apne reflection ko dekh rahi thi… aur smile kar rahi thi.
Kabhi kabhi jab main mirror ke saamne akeli hoti hu, toh main khud se ek sawaal poochti hu:
“Are you happy?”
Aur honestly…
main apne reflection ko dekh kar hamesha kehti hu —
“Alhamdulillah, main bahot khush hu.”
Life mein problems ho sakti hai, issues ho sakte hai…
lekin ek smile khud ke liye toh banti hai.
Client ka kaam khatam karke main J Market gayi, kyunki Fawdi ko juti leni thi.
Shopkeeper ne bola 300 fixed rate.
Lekin mujhe fixed rate ka concept samajh hi nahi aata. 😄
Main seedha bargaining mode mein —
250… phir 280…
End mein maine 300 hi diye aur bola:
“10 rupay toh wapas karo.”
Usne mujhe 10 ka coin diya aur bola — “Bahot kanjoos ho aap.”
Maine proudly bola:
“Salary kam hai na isliye.” 😄
Phir hum dono happily ghar aa gaye.
Raaste mein 10 rupay ke cream & onion chips liye aur khate khate, haste haste ghar pahunch gaye.
Ghar aakar maine Abbu ke saath thodi panchayat ki, phir phone dekha toh Darling ke 2 missed calls aur message — “Hii kaha ho?”
Maine usse call back kiya.
Usne bataya ki usse hamare college ke technical analysis teacher mil gaye the.
Usse thoda awkward feel hua, aur mujhe bhi woh vibe samajh aa gayi. Phir humne thodi college aur office ki baatein ki.
Ghar bhi tab tak saaf ho gayi thi.
Khana kha kar maine laptop open kiya, room ki light off thi aur phone ki torch chalu karke blog likhna start kiya.
Abhi right shoulder mein pain bhi hai. Kabhi mental problem, kabhi physical pain — life balance banaye rakhti hai.
Bas dil se ek dua nikli:
“Allah sabko healthy rakho.
2 roti kam chalegi, par sukoon wali sehatmand zindagi zaroor mile.”
Abhi 11:02 p.m. ho gaye hai.
Yeh toh rough blog hai, isse polish karne mein alag time aur energy lagegi.
Lekin main likh rahi hu… kyunki mujhe likhna pasand hai.
Aur mera ek goal hai —
saal ke end tak 365 blogs likhne ka.
Aaj ka blog toh kaafi lamba ho gaya.
Alhamdulillah for everything.
Pyaar un logon ke liye jo mujhe pyaar karte hai…
aur dua unke liye bhi jo mujhe pasand nahi karte.
Sab khush rahe, salamat rahe… aur sabke paas akal ho. Even me too. 😄
— Safar Nama 🌙
Har din ek nayi kahani, ek naya ehsaas de jaata hai,
Safar chalta rehta hai… aur dil bas “Alhamdulillah” keh jaata hai. ✨
No comments:
Post a Comment