DAY 178: 28.06.2026: DAy Went in Quraankhani.. Pata hi nahi Chala..

28-06-2026 🌙

Hello~ Guyssss~ ❤️

Abb kal raat... honestly almost subah ke 4 baje tak mast chit-chat chalti rahi. Itni der tak baatein karne ke baad obviously subah late uthna hi tha. Mujhe khud se ek hi line kehni padi:

"Mujhe kya log barbaad karenge... main toh khud hi barbaad hoon." 😂

Mast aaram se uthi, brush ki aur seedha chai garam karne lagi. Waise ek baat bataun? Mujhe gas on karne se  bhi bahot darr lagta hai... matlab bahot hi zyada. Isliye main hamesha dheere se "Bismillah" padh kar hi gas jalati hoon. Dil ko thodi tasalli mil jaati hai.

Chai ko maine ek cup mein bilkul upar tak bhar liya. Ab chai toh ready thi, bas pav aur butter ki kami thi. Main idhar-udhar dekh hi rahi thi ki dono aur finally!! mil gaye. Waooo! Phir kya tha... ek full pav chai mein dip karke maze se khaayi hu. Alhamdulillah! Kabhi kabhi simple breakfast bhi itna satisfying lagta hai.maza aagyi...

Uske baad thodi der chatting karke time-pass kiya. Phir maine ek chhoti si habit start ki. Maine apna ek achievement sticky note par likha aur usse apni study wall par chipka di. Achievement chahe kitni bhi chhoti ho, usse acknowledge karna bhi ek achievement hi hoti hai. Mujhe laga yeh habit mujhe motivate karegi.

Aaj hamari baju wali aunty ke ghar Quraankhani thi. Main mast naha-dhoke ready ho gayi aur Aunty ke ghar pahoch gayi..abb thodi der mai mera chhota Bhaii La. La.  saamne aa gaya. 😂Usne White Kurta Pajama aur topi pehni hui thi, poora attar lagaya hua tha. Mujhe dekh kar woh sharma bhi raha tha aur smile bhi kar raha tha.

Dil se ek hi baat nikli...

"Yeh chotu baby kab itna bada ho gaya? Lagta hai mujhse bhi bada ho gaya."

Aur sabse special baat yeh thi ki hum dono ki zindagi mein pehli baar hum ek saath kisi Quraankhani mein baithe the. Alhamdulillah, it felt really special.

Pehle woh mere saamne baitha aur phir dheere se mere baju mein aa gaya. Smile karte hue usne halki si awaaz mein kaha,

"Aapa... jaldi jaldi padh. Kitna slow padh rahi ho." 😂

Honestly, shuru shuru mein leader banna bahot mazedaar lag raha tha. Lekin thodi der baad woh responsibility irritating lagne lagi kyunki baar-baar meri speed ka flow break ho raha tha.

Aakhirkar do para complete hue aur phir hum 26th Para padhne lage. Mujhe kuch jagahon par rukna pad raha tha toh aunty ne bahot patiently meri help ki. Unhe dekh kar mujhe sach mein bahot accha laga. Woh har lafz se itni familiar thi ki mashallah bahot hi fluently aur confidently padh rahi thi. Mujhe unse kaafi kuch seekhne ko mila.

Aunty ki mummy, yani unki Nani, ki tabiyat bhi kaafi kharab chal rahi hai. Woh kaafi aged hain. Dil se dua hai ki Allah unhe shifa-e-kaamilah ata farmaaye. Ameen. 🤲🏻

Finally, ek poori Quraankhani mukammal hui. Alhamdulillah.

Sach kahun toh aaj ke time mein hamare area mein Quraankhani organize karna kaafi mushkil ho gaya hai. Logon ke apne-apne reasons hote hain, isliye bahot kam log aate hain. Lekin agar khane ki dawat ho, toh log bhaagte hue pahunch jaate hain. Yeh dekh kar thoda bura bhi lagta hai. Kabhi kabhi lagta hai ibadat ke liye waqt nikalna logon ke liye kitna mushkil ho gaya hai.

End mein aunty ne sabko do types ke namkeen, biscuits aur thandi Sprite serve ki. Waooo! Main toh sharam ke maare bas thoda sa hi kha paayi. 😭

Waise mujhe bilkul yaad hi nahi tha ki aaj hamare ghar Kichda ban raha hai. Jab tak mujhe yaad aaya tab tak woh ready bhi nahi hua tha. Aur idhar main sharam ke chakkar mein wahan properly kha bhi nahi paayi thi. Result? Main bhookhi thi aur irritation level full high. Ghar aakar toh maine thoda shor bhi machaya. 😂

Kaafi der baad finally Kichda ready hua. Ghar ki safai hui, Fatiya hua aur phir mummy ne mere liye ek badi si plate bhar kar Kichda serve kiya. Upar se lemon, crispy barishta aur saath mein zeera rice...

Allah! Kya taste tha! Alhamdulillah. Har bite dil ko sukoon de rahi thi.

Uske baad mummy ne mere cousin brothers ko bhi phone karke bula liya. Woh sab mujhse bahot sharmaate hain, lekin phir bhi aaye aur pyaar se dinner kiya. Mummy ne unhe ghar par hi khana khilaya. Ghar ka mahaul bahot accha lag raha tha.

Dinner ke baad main phir apni favourite cheez karne baith gayi—blog writing.

Main raat ke lagbhag 2:30 baje tak continuously likhti rahi. Lekin sach kahun toh us din jo blog likha... usse padh kar mujhe khud bahot khushi hui. Mujhe woh genuinely bahot pasand aaya. Kabhi kabhi mehnat thaka zaroor deti hai, lekin jab result dil ko pasand aa jaaye na... toh saari thakaan gayab ho jaati hai.

Aur phir... jaise har din ka ek sukoon bhara ending hota hai...

Meri mast Chand se baat hui. 🌙❤️

Uske baad dil halka sa ho gaya, chehre par smile thi... aur main aaram se so gayi.

Kal phir office bhi jaana tha.

Alhamdulillah for another beautiful day. 🤍