11-03-2026 | Ramadan Day 21 🌙
Hii… Kaisa tha aaj ka din? life ke maze chal rahe hain ya phir band baji padi hai, ye samajh nahi aa raha. Sach bolu toh aaj kal meri toh proper band baji hui hai, kyunki roz office late pahoch rahi hu. Abhi se itni garmi hai… suraj mamu full power mein aa gaye hain. Soch rahi hu agar abhi March mein itni heat hai toh April, May aur June ka kya hoga. Bas dua hai ki kisi tarah ye garmi nikal jaye.
Chalo aaj ka pura din document karti hu.pehle hi Im informing the blog is long
Subah 7:40 a.m. ko uthi. Office 8:45 a.m. ka hai, jo ki practically impossible ho gaya tha, kyunki mujhe hair wash bhi karna tha aur fresh bhi hona tha. Kal se main phir se roza restart karne wali hu, toh thoda routine set karna tha.
Phir 9 baje main ghar se nikli aur pata chala ki ghar mein cash nahi hai aur mere phone mein internet bhi nahi tha. Maine iss time bas 199 ka recharge karwaya hai jisme pura month sirf 2GB data milta hai… aur woh bhi ek week mein hi khatam ho jata hai. Lekin kya karein, abhi itni ameer bhi nahi hu ki mehenga recharge karu.
ATM gayi toh pata chala ATM hi kaam nahi kar raha. Phir kya… metro station tak bhaagna pada bhai ke saath taaki cash nikal kar mummy ko de du. Mummy ne mujhe 100 rupees diye the kaam ke liye.
Subah-subah full drama already ho chuka tha. Ab bus ka wait kar rahi thi… par bus hi nahi aa rahi thi. Metro bhi option tha lekin waha ticket ki line thi aur mujhe 8 rupees save karne the (budget life 😅). Tabhi ek sharing auto wale uncle aaye aur main seedha usme jump kar gayi kyunki late ho rahi thi. Ek ladki aur ek ladka bhi the, hum teen log Andheri station ke liye nikal gaye.
Pehle ye uncle 10 rupees lete the… ab yaha bhi inflation — 15 rupees ho gaye. Aur jab 100 rupees diye toh unke paas chutte nahi the. Toh maine 10 rupees diye aur 5 rupees udhaar reh gaye. Inshallah kabhi milenge toh de dungi.
Phir slow train se office pahochi aur time ho chuka tha 9:30 a.m.. Itni sharam aa rahi thi ki kisi ka face hi nahi dekha. Seedha apne desk par baith kar newspaper padhne lagi. Hamare V sir ko pata hai ki pure office mein main hi ek dedicated newspaper reader hu.So the paper is always there on my desk.
Phir kaam start hua. 1 baje client meeting thi mutual fund investment forms drop karne ke liye. Bahar kadak dhoop thi aur mujhe bahot mann ho raha tha ki ek juice ya cold drink pee lu. Lekin Ramadan ke time honestly mujhe bahot dar lagta hai… pata nahi koi dekh le ya koi pehchaan wala mil jaye. Main safe jagah dhoond bhi rahi thi jaha kuch kha-pee sakun, par himmat hi nahi hui. Isliye main seedha auto lekar wapas office aa gayi.
Office mein 12:30 se 2:00 ke beech kabhi-kabhi thoda timepass hi hota hai kyunki clients ka bhi lunch time hota hai. Phir 4 baje tak calling chalta raha.
Around 3:30 maine senior se permission li ek aur meeting ke liye. Yeh meeting ek Bohri Muslim client ke ghar par thi. Unke husband ka unfortunately 2 months pehle dehant ho gaya tha. Ab unke shares unki wife ke account mein transfer karne the, aur uske liye video verification zaroori tha. Lekin unki iddat chal rahi thi, isliye woh kisi gair mard se mil nahi sakti thi aur ghar mein bhi koi available nahi tha.
Main Bohri colony pahochi. Tab tak main bahot thak chuki thi, garmi aur pyaas se halat kharab thi. Lekin waha enter karte hi mera mood thoda change ho gaya. Waha ka environment bahot hi alag aur beautiful tha. Dono sides par buildings thi aur beech mein ek clean road. Waha ek bahot khubsurat masjid thi jo door se dekhkar hi peaceful feel ho raha tha.
Chhote-chhote bachche topi pehen kar cycle chala rahe the. Har building ke bahar glass wall par “Ya Ali” aur “Ya Hussain” red color mein likha tha. Har ghar ke darwaze par bhi wahi likha hua tha. Yeh sab dekhna mere liye naya experience tha kyunki unki community ka lifestyle bahot different aur organized laga.
Unke ghar ke andar Saudi style rugs the aur floor par pillows the jaha family gathering ke liye log baithte honge. Unhone mujhe paani offer kiya lekin maine mana kar diya. Phir unhe samajh aa gaya ki Ramadan hai, toh unhone mujhe masala peanuts aur khajoor ka small pack diya. Sach bolu toh meri wishlist mein bhi tha ki kabhi Bohri ghar ka experience mile… aur aaj mil gaya.
Kaam complete karke main wapas ghar aa gayi.
Aaj kal garmi sach mein bahot zyada ho rahi hai. Shaam ko iftar kiya aur phir thodi shopping bhi ki. Mujhe realize hua ki market mein bhi bahot Pinterest-style aesthetic cheezein mil rahi hain… bas hume price knowledge hona chahiye taaki comparison kar sakein.
Finally hum 11:40 p.m. ke around ghar wapas aaye.
Aur bas… is tarah khatam hua mera Ramadan Day 21 — thoda thakaan, thoda struggle, thoda observation aur end mein thodi si shopping. 🌙✨
-Safarnama 🌙
No comments:
Post a Comment