18-02-2026
Aaj ka din shuru toh bilkul usual hi hua. Wahi routine, wahi subah ki halki si neend bhari aankhen, wahi ghar ki awaazein. Sab normal.
Lekin jaise jaise din shaam mein badalne laga na… meri nazrein bas aasman pe tik gayi.
Dil se ek hi dua nikal rahi thi —
“oo pyare chand, Ramadan ke… jaldi milo.”
Bas ek jhalak mil jaaye. Main toh ready thi — poori list lekar. Socha tha jaise hi tum dikhoge, main seedha apni duaaon ki diary khol dungi — “yeh chahiye, woh chahiye… aur sab fatafat qubool bhi kar dena.”
Aaj aasman ka rang bhi kuch alag hi tha. Thoda narangi, thoda gulabi, thoda shaant. Hawa mein ek alag si raunak thi. Ek intezaar. Ek halka sa excitement.
Meri mummy toh alag hi mode mein thi. Itna zyada paise spend kar leti hain bina soche, lekin bargaining mein full expert.
Jaise hi main bus stop pe utri, peeche se awaaz aayi —
“Aapa!”
Lala tha.
Aur saamne kya scene? Mummy fruite wale ke saath full bargaining mood mein.
“Bhaiya itna mehenga kyun? Thoda kam karo…”
Main bas dekh kar muskura rahi thi. Ramadan ka chand chahe dikhe ya na dikhe… ghar ka Ramadan mood officially shuru ho chuka tha.
Lekin phir… chand nahi dikha.
Har jagah debate chalu.
Koi keh raha hai dikha.
Koi keh raha hai nahi dikha.
Koi Saudi ka reference de raha hai, koi allegations laga raha hai — “waha bhi confirm nahi hai…”
Sach kya hai, kya nahi — Allah jaane.
Par ek baat simple hai —
Humein kya?
Roza rakhna hai.
Niyat saaf rakhni hai.
Sehri ka intezaar karna hai.
Aur phir shuru karni hai ibadat.
Ab bas raat ka intezaar hai. Sehri ka alarm. Thodi si neend. Thoda sa sukoon.
Aur ek nayi shuruwat.
Roza.
Sabr.
Duaa.
Aur bahot saari ibadat. 🌙✨
No comments:
Post a Comment