Safarnama

06.08.2026

Hello Guys...

Aaj ki subah ne mera mast mood bana diya!

Baat kuch aisi hai... as usual mai office 9:30 baje, matlab ek ghanta late pahochi. Jaise hi second floor par gayi, waha se kaafi awaaz aa rahi thi. Dekha toh lagbhag 20–25 students floor par baithe hue the. Ek second ke liye laga ki class ke andar jagah nahi hai ya phir punishment mili hai.

Maine haste hue pucha, "Andar class mein jagah nahi hai ya punishment mili hai?"

Unki smile dekh kar meri bhi smile aa gayi.

Left side mein ek fair aur cute sa ladka bola, "Punishment mili hai." 😂

Maine kaha, "Waah! Mujhe mere school days yaad aa gaye. Hum logon ko bhi aise hi ground mein punishment milti thi."

Phir maine class ka door thoda sa open karke kaha, "Smile karo, mujhe tum logon ki ek photo leni hai... chupke se."

Teacher ne haste hue bola, "Isse pehle yahan ke staff aur tumhari izzat dono chali jaaye, sab finish karo."

Aur saare students ek saath bole, "Ma'am, izzat toh pehle hi chali gayi hai!" 🤣

Bas... meri morning wahi ban gayi. Itni hasi aayi ki pura mood fresh ho gaya.

Uske baad as usual office ka kaam, lunch walk karne mai niche bhi gyi thii btw Aaj lunch mein chole-rice aur Peri Peri chips the. Lunch ke baad toh itni neend aa rahi thi ki bas sone ka mann kar raha tha... lekin office mein neend kahan milti hai! Isliye side by side kaam karti rahi.

Aaj maine apna wallpaper bhi change kiya. Is saal mera aur Chand ka ek challenge chal raha hai. Hum dono same wallpaper lagate hain. Abhi ke liye toh challenge on hai.( socha nhi tha but khud ba khud hone laga)

Waise aaj kal pata nahi kyun... mann mein ek ajeeb si uljhan chal rahi hai. Reason samajh nahi aa raha.

Aur phir aayi aaj ki highlight... Aaj meri bus driver se ladai ho gayi.

Main bus mein so gayi thi kyunki aankhon mein bahut pain tha. Meri stop nikal gayi. Maine politely uncle se kaha ki door open kar dijiye, main so gayi thi. Lekin unhone seedha mana kar diya.

Ab mujhe waise hi aise drivers par jaldi gussa aa jata hai. Traffic tha, maine socha khol hi denge. Lekin woh apni baat par ade rahe.

Phir maine bhi zor se bola, "Khol do uncle!"

Unhone kaha, "Accident ho jayega."

Maine gusse mein bol diya, "Ho bhi gaya toh aapko kya?" Shayad mujhe woh line nahi bolni chahiye thi, lekin us waqt gussa control nahi hua.

Tabhi piche se ek awaaz aayi, "Ladki hokar awaaz dekho..." Bas... wahi word mujhe chubh gaya. "Ladki hokar."

Main turant piche mudkar boli, "Main equality par believe karti hoon. Beech mein mat aaiye. Yeh meri aur driver uncle ki baat hai. Main handle kar lungi." ( full battamez)

Meri ladai sirf darwaza khulwane ki thi. Mujhe sirf itna bura laga ki log situation samajhne ke bajaye gender ko beech mein le aate hain.

Khair... last mein driver ne door khol diya.

Result? Na mera kuch hua, na unka. Bas sabka mood kharab hua.

Ghar aakar jab maine yeh baat batayi, toh sabne wahi kaha ki galti meri hi thi kyunki main bus mein so gayi thi. Shayad unki baat bhi apni jagah sahi thi. Lekin us waqt mujhe support ki zarurat thi, judgement ki nahi. Khair... expectations kam rakhna hi better hai.

Uske baad Dara ne chai banayi. Hum dono ne saath mein chai pi, phir kisi baat par argument bhi ho gaya. Aaj kal lagta hai mere thoughts shayad kisi se match hi nahi hote. Shayad isliye mujhe har baat share karna bhi kam kar dena chahiye. I will try..

Shaam ko 4lyferz se baat hui. Sabeb ka employee ke mein pehla din tha.

Dear saba.. Allah tumhe bahut kamyaabi de. InshaAllah tum hamesha progress karo, aur hum sab tumhari success celebrate karein. Ameen. ❤️

Raat ko ghar par bahar se khana aaya —Schezwan noodles aur chicken soup. Kisne party di mujhe abhi tak nahi pata, shayad Abbu ya Ammi ne. Hum sab ne saath mein khana khaya, phir maine lagbhag ek ghanta reels dekhi.

Aur ab... din khatam karne se pehle yeh blog likh rahi hoon.

Alhamdulillah for the day.

— Safarnama 🌙