🤍DAY 169: 19-06-2026 🌙 | 3rd Moharram| A small Break - A leave- First Friday🤍

19-06-2026 🌙 | 3rd Moharram

First Friday of the Islamic Year 🤍

Aaj maine kaafi koshish ki jaldi uthne ki, but pichle kuch dino se meri body physically bahot low feel ho rahi hai. Thoda stomach pain bhi tha aur honestly mujhe reason pata hai.

Pichle 2 din se maine properly healthy food nahi khaya hai aur jab hum rozon ki routine start karte hai na, toh body ko bhi naya schedule accept karne mein thoda waqt lagta hai. Isliye maine aaj office se leave lene ka decide kiya.

Sacchi kahu... Main kaafi dino se padh nahi rahi hu, discipline properly follow nahi kar rahi hu aur mere bahot saare kaam pending hai.

Aur agar yeh sab random dino mein hota na... Toh abb tak main pakka frustrate ho chuki hoti.

Lekin ajeeb si baat hai... Main pichle 3-4 dino se bilkul bhi frustrated nahi hu. Because I feel like I'm in sujood. Woh sukoon... Jiski maine apni life mein bahot dua maangi thi. 🤍

Abb main around 11:00 a.m. ko uthi. Aur phir mera classic version... 1.5 hour lag gaya Gusl lene mein. 😂 Mast hair comb kiya, Wazu kiya aur phir Qur'an padhna start kiya.Maine dil se Qur'an lagayi aur bas Allah se itna kaha:

 "Ya Allah, You know what is best for me. Main har cheez qubool karti hu jo aap mere liye behtar samajhte ho."

Sacchi kahu... Main kabhi itni imaan wali insaan thi hi nahi. Lekin Allah ne life mein aise-aise reality checks diye... Aise mod diye... Ki kaise na kaise karke mujhe Namaaz, Qur'an aur Deen ki taraf bula liya. Aur iss baat ke liye main Allah ka jitna shukr karu utna kam hai. Aaj maine Qur'an ka 4th Para mukammal kiya. Yaseen Shareef padha. Thoda Zikr kiya. Aur din ki 5 Namaaze bhi padhi.

Aur sach kahu... Mujhe itna sukoon mila ki main words mein define hi nahi kar sakti. Main bahot roti hu. Bahot baar khud ko haara hua feel karti hu. Lekin jab main Namaaz padhti hu na... Toh main apni problems bhool jaati hu. Aur bas Allah yaad rehte hai. Aur phir dil halka ho jaata hai.

Alhamdulillah. 🤍

Shaam ko mast Roza mukammal hua. Namaaz ke baad meri thodi der Adi se baat hui.

Aur phir beech mein Abbu ka call aaya. "Khush, jaldi JB Nagar aa. Mujhe ek dentist ka clinic mila hai aur main tera wait kar raha hu."- Wahhh abbu wahhhhh

Main turant uth kar baal comb kiye aur nikal gayi. Raaste bhar Adi baat karna chahta tha aur uski continuous calls chal rahi thi. Lekin ussi beech Abbu ke 4 calls already aa chuke the. Main ignore kar rahi thi. Phir maine Adi se permission maangi aur kaha: "Mujhe call disconnect karna padega. Abbu wait kar rahe hai."

Aur honestly... Yeh koi aur Abbu hote toh ek thappad toh pakka pad gaya hota. 😭😂

Itni der se wait jo kar rahe the. Lekin mere Abbu ne bas itna kaha: "Main bahar nahi khada hu. Andar hu. Bas dhundh ke fatafat aa ja."

Problem yeh thi ki pichle week se Abbu ke left side upper teeth mein pain tha aur swelling bhi thi.

Lekin woh ignore kar rahe the.

Reason?

Humare chawl area mein unke according saare dentist lutaire - chor  hai. 😭😂 Aur mere Abbu ko chahiye tha ek luxury aur fancy clinic. Abbu is Abbu want luxury treatment. JB Nagar wale clinic mein doctor ne sirf check-up kiya.

Kuch medicines di. Aur next appointment de di.

Phir bole: "X-Ray karwana padega." Aur saath mein yeh bhi bataya ki 2 teeth toot gaye hai aur cavity bhi hai. Unhe nikalna padega.

Charges? 2.5k per tooth. Matlab total 5k. Aur X-Ray alag 500.

Wahhhh... Paise par paise kharch. 😭 Raat mein maine Abbu se ice-cream treat maang li. Half ice-cream khane ke baad mujhe yaad aaya ki maine Abbu ko offer hi nahi ki. Aur waise bhi main usse itne gande tareeke se kha chuki thi ki mujhe laga woh mana kar denge.

Maine bola: "Abbu taste karo na." Phir maine convince karne ke liye kaha:"Waise bhi mere teeth aapse zyada saaf hai. Puri kha lo." 😂😂

Aur guess what? Abbu ne le bhi li. Ice-cream sabko pasand hoti hai after all. 🍦😂

Raaste mein humne bahot saari baate ki. Uske baad medical store gaye. Aur yaha bhi ek choti si story hai. Maine socha Abbu ka phone le leti hu aur medicines lene ke saath-saath apni personal cheeze bhi le lungi.

Aur payment Abbu ke GPay se kar dungi. 😌

Lekin...

Abbu toh Abbu hai. Woh bole:

"Chal main bhi aata hu. Teri safety ke liye. Waha daru ke adde hai. Warna teri Ammi mujhe daantegi ki bacchi ko akele bhej diya."

Aur main andar hi andar soch rahi thi... "Abbu... main iss road par har roz akele aati hu." 😭😂

Phir hum dono saath gaye.

Medicines li. Aur ghar aa gaye. Ghar aakar maine kuch blogs post kiye. Aur phir so gayi.

Aur haan... Sone se pehle around 12:30 a.m. par maine garam garam, tasty wali Maggie bhi khaayi. 🍜✨

Aur uske baad din officially khatam.

Guys Maine bahot Friday ki Namaaz skip ki hai and when I want mujhe nasseb nahi hoti thi but finally Allah invited me.. Sukr and sukr

Alhamdulillah for everything. 🤍

— Safarnama 🌙