🌸DAY 147: 28-05-2026: Eid ul Ada Mubarak

 28-05-2026

Assalamualaikum Everyone... 🌙✨

Eid ul ada Mubarak! 🤍

Waooo... jis din ka itna intezaar tha, woh finally aa hi gaya. 🥹🌸

Sach kahu toh Eid ki excitement mein kal raat bahut plans banaye the. Socha tha subah jaldi uthungi, Fajr padhungi, thoda Quran padhungi aur phir poore din ko achhe se enjoy karungi. Lekin mai itni gehri neend mein thi ki Fajr miss ho gayi. 😭 Aur jab meri aankh khuli toh sabse pehla emotion excitement nahi, guilt tha. Dil thoda udaas ho gaya aur maine bas khud se kaha, "Khush... aaj Eid hai, udaas hokar nahi shuru karna din." 🤍

Phir maine decide kiya ki jo waqt mere paas hai usse achhe se use karungi. Mujhe honestly yaad bhi nahi mai kitne baje uthi, lekin itna yaad hai ki Eid ki namaz ho chuki thi aur ghar mein Eid wali vibes poori tarah shuru ho gayi thi. 🌸 Sabse pehle maine apni mehndi dekhi aur ya Allah! 🥹🤎 Mashallah itni pyari colour aayi thi ki mai bas haath dekh kar hi khush ho rahi thi.

Uske baad phone uthaya aur Eid ke liye ek cute sa picture click kiya. Kyuki obviously... Eid day document karke dikhana tha. 😌✨ Phir kya, story editing mode ON. 📱😂 Maine Eid ki story post ki, Instagram par updates dale aur breakfast karte karte dekhte hi dekhte baaton ka session shuru ho gaya.

Waise mere ghar mein Eid ke din sabka favourite kaam hai... Sona. 😭😂 Lekin mujhe pata tha agar mai bhi so gayi toh poora din waste ho jayega aur mai iss Eid ko yaadgaar banana chahti thi. Isliye maine aaram se nahaya, thoda self-care kiya aur phir thodi der Quran padhne baith gayi. 🤍 3rd para se padhna shuru kiya aur dekhte hi dekhte kaafi waqt nikal gaya. Phir Zuhr ki namaz padhi aur uske baad kuch nafl namazein bhi padhi.

Aur honestly... uss waqt dil mein jo sukoon tha na, usse words mein explain karna mushkil hai. Bas dil se baar baar ek hi cheez nikal rahi thi... Alhamdulillah. 🤲 Kabhi kabhi lagta hai Eid sirf naye kapde aur photos ki nahi hoti. Eid un moments ki bhi hoti hai jab aap Allah ke aur kareeb feel karte ho. Aur aaj mujhe wahi feel ho raha tha. 🤍

Uske baad ready hone ka time aa gaya aur yahin se shuru hua aaj ka drama. 😭😂 Mai apni dress dhoond rahi thi aur tab pata chala... Iron hi nahi hai! Bas phir kya, maine poore ghar ko hila diya. "Ammiiiiii! Iron kahan hai?" Aur jawab mein mujhe daant mili. 😂 Gussa bhi aaya, thoda rona bhi aaya aur phir maine khud ko samjhaya, "Khush, aaj Eid hai. Chill."

Face wash kiya, mood reset kiya aur phir Abbu ne hero bankar meri dress save kar diye. 😭🖤 Dress iron karke ready kar di gayi aur mai finally ready ho gayi. Aur honestly... aaj mai khud ko dekh kar bahut khush thi. 🥹✨

Maine itni photos aur videos banayi jitni shayad poore mahine mein nahi banati. Water Sprite piya, chakli khayi, Maggi bhi khayi aur pata nahi aur kya kya khaya. 😂 Eid wale din calories count nahi hote. Ye mera personal rule hai. 🤭 Poora din photos, videos aur memories collect karne mein nikal gaya. Stories post ki, best transition reel banayi aur obviously apni 4lyfers gang ke saath share bhi ki. ❤️✨

Lekin sach kahu... aaj mera phone bhi meri tarah bahut overexcited tha. Ya shayad mai hi thi. 😭 Kyuki aaj maine bahut zyada scrolling bhi ki. Kabhi Instagram, kabhi photos, kabhi reels aur kabhi khud ki pictures dekhna. Bas wahi sab.

Plan toh full bahar jaane ka tha, lekin woh plan successful nahi ho paya. Reason? Meri sister Dara. 😂 Uska mood nahi tha aur kal uska birthday bhi tha. Toh maine bhi zyada force nahi kiya. Aur honestly... jab photos itni achhi aa jayein na, toh ghar wali Eid bhi best lagne lagti hai. 🤭🌸

Aaj ke poore din ka favourite part agar mujhe choose karna ho toh woh namaz ka waqt tha. Wahi waqt tha jab dil sabse zyada shaant tha. Wahi waqt tha jab mujhe laga ki mai exactly waise hi banna chahti hu jaise Allah mujhe dekhna chahta hai.

Still learning...
Still trying...
But moving forward. 🤍

Aaj ka blog thoda short hai. Lekin Eid ka din bahut beautiful tha. Aur shayad kuch din itne simple hote hain ki unhe zyada words ki zarurat hi nahi hoti. Bas ek feeling kaafi hoti hai...

Gratitude. 🌙✨

Allah ka lakh lakh shukr hai iss din ke liye. Iss ghar ke liye. Iss family ke liye. Iss sukoon ke liye. Aur un sab logon ke liye jo meri zindagi ko khoobsurat banate hain. 🤍

Alhamdulillah. 🤲🌸

- Safarnama ✨