11.07.2026

Hii Guys...

From the bottom of my heart... Sorry for the late post. I was busy solving some question sets and honestly, abhi bhi meri life full speed mein chal rahi hai. Itne saare kaam ek saath chal rahe hain ki maine socha tha aaj post hi skip kar deti hoon. But phir laga... itni bhi busy boss nahi bani hoon. At least aaj ke highlights toh share kar hi sakti hoon.

Aaj ki morning kaafi happy thi. Pata nahi kyun, randomly mera mann hua aur maine ek chhota sa video bana kar 4lyferz mein story daal di. Mast laga. Kabhi kabhi bina kisi reason ke bhi kuch post karne ka alag hi maza hota hai.

Uske baad mujhe phir se Bori Colony jaana tha. Aur guys, aaj Rida Ma'am ne mujhe ek bahot bada Cheese Biscuit ka packet gift kiya. Main pehle toh bahot na-na kar rahi thi, but unhone itne pyaar se diya ki finally mujhe lena hi pada. Jaise hi office pahunchi, K Sir ne haste hue poocha, "Kuch mila tujhe?" Maine bhi haste haste bola, "Of course!" Sach kahu na, mere pure office mein shayad sabse zyada treats mujhe clients se hi mili hain. Aur mujhe genuinely samajh nahi aata itna appreciation kis baat ka. Honestly, mujhe toh lagta hai office mein main kuch khaas karti hi nahi hoon. Phir bhi log itne pyaar se yaad rakhte hain, aur woh feeling bahot acchi lagti hai.

Aaj office mein hum sabne apna weight bhi check kiya. Aur guess what... mera weight dekh kar main khud shock ho gayi. Mujhe laga tha kam se kam 45-48 kg ke aas-paas toh hoga, lekin usse bhi kam nikla. Waise kam hona bhi theek hai, bas pet bahar nahi aana chahiye. 😂 Sach bolu, Alpha dekhne ke baad main thodi si Alia Bhatt se inspire ho gayi hoon. Yaar, mujhe bhi ek mast fit body chahiye. Pata hai abhi meri aukaat ke bahar lag raha hai, but koi baat nahi. Ek din uske liye bhi kaam karungi.

Waise aaj office mein koi khaas kaam nahi hua. Full T.P. chal rahi thi kyunki humara terminal shift ho raha tha. Terminal matlab wahi system jisse hum clients ke behalf par shares buy aur sell karte hain. Office mein usko lekar full chiaao-chiaao machi hui thi. Beech mein maine apne Jai Bhavani wale Sir ke saath online charts study kiye. Hum dono ne milkar kuch stocks research kiye aur kuch recommendations bhi mili. Mujhe aise sessions bahot pasand aate hain kyunki har baar kuch na kuch naya seekhne mil hi jaata hai.

Phir main ghar aa gayi. Bahar itni dhoop aur garmi thi ki bas pucho mat. Ghar aate hi maine dal-chawal ke saath gaon ka aam ka achaar khaya. Yaar... naam likhte likhte hi muh mein paani aa gaya. Uske baad maine woh series dekhni shuru kar di jo main 2023 se dekhna chahti thi. Us series ke saath kitni memories judi hui hain. 2023 mein main aur Chand dono Sabeb ke ghar gaye the. Mujhe lagta hai uss din Obi ka birthday bhi tha. Cake tha, Maggie thi aur humne ussi series ka ek episode dekha tha. Tabhi se socha tha ki kabhi na kabhi isse properly complete karungi. Aur finally aaj woh din aa hi gaya.

Waise mujhe scam aur paiso se related series dekhna bahot pasand hai. Unmein har baar kuch naya perspective milta hai. Is series se bhi bahot kuch seekhne mila aur kaafi nayi cheezein samajhne mili. Bas ek hi complaint hai... last episode ki ending mujhe bilkul satisfying nahi lagi. Aisa laga jaise story adhuri chhod di ho. Lekin uske alawa poori series bahot mast thi.

Aur phir pata hi nahi chala kab poora din nikal gaya. Series dekhte dekhte mera pura schedule ulta ho gaya. Padhai side mein reh gayi aur baaki saare kaam bhi. Raat ko finally maine khud ko thoda push kiya aur socha, "Bas kuch questions solve kar leti hoon taaki Sunday ke liye momentum bana rahe." Maine thode questions solve kiye aur uske baad seedha so gayi.

Kabhi kabhi productive day ka matlab sirf kaam karna nahi hota. Kabhi kabhi apne mind ko bhi break dena zaroori hota hai. Aur shayad... aaj wahi din tha.

– Safarnama