27-05-2026
Assalamualaikum Guys... 🌸
Hii....
Taking a deep breath in and breathing out...
Sabse pehle sorry ki mai itne din consistently post nahi kar paayi. Festival season chal raha hai aur iss time mera routine bilkul unpredictable ho jata hai. Koshish toh bahut karti hu likhne ki, lekin honestly festival enjoy karne ke mood mein thi. 😅
Chalo phir aaj ka safarnama shuru karte hain... 🤍Aaj ka din mere liye thoda special tha.
Jo log nahi jaante unke liye thoda sa bata du ki Arafah kya hota hai aur hum Muslims is din ko itna khaas kyun mante hain.
Arafah Hajj ka sabse important din mana jata hai. Is din duniya bhar se aaye huye hujjaj Maidan-e-Arafat mein jama hote hain aur Allah se dua, tauba aur maafi talab karte hain. Ye din Allah ki rehmat aur maghfirat ka din mana jata hai.
Aur jo log Hajj par nahi hote, unke liye Arafah ka roza rakhna bahut fazilat wala mana gaya hai. Kaha jata hai ki Allah is roze ki barkat se pichle aur aane wale ek saal ke gunahon ko maaf farma dete hain. Isliye duniya bhar ke Muslims is din roza rakhte hain aur Allah ke aur kareeb hone ki koshish karte hain. 🤲✨
Pata nahi mai kitni perfect hu ya nahi, lekin dil mein ek khwahish thi ki iss mubarak din ki barkat mein mera bhi ek chhota sa hissa ho. ❤️
Aur phir...
Aaj mai ek shock ke saath uthi. 😳Achanak guess what hua? Mujhe laga kisi ne mujhe bahut zor zor se awaaz lagayi hai. Maine aankh kholi aur kuch seconds tak samajh hi nahi aaya ki mai khwaab mein hu ya reality mein. 😭Actually mai aur Dara ne milkar decide kiya tha ki hum Arafah ka roza rakhenge. Jab mujhe sehri ke liye uthaya gaya tha tab mujhe properly hosh bhi nahi tha. Not lying, lekin mai itni thak jaati hu ki kabhi kabhi seedha subah aankh khulti hai. Aur isi wajah se subah ki shuruaat thode guilt ke saath hui. Phir 5 minute tak mai bas chhat dekhti rahi aur sochti rahi. Aur phir dil ne kaha... "100% perfect nahi ho sakti toh kya hua... 1% koshish toh kar sakti hu." 🤍 Bas phir kya... Mai bed par baithi, dil par haath rakha aur dil se niyat ki ki Arafah ka roza rakhungi.
Naha-dho kar ready hui, apni new purple colour ki dress pehni aur ek good girl ki tarah office ke liye nikal gayi. 💜✨
Office pahunchkar thodi padhai ki, LinkedIn post dala aur phir kaam shuru.
Work...
Work...
Aur phir thoda aur work... 😭😂
Beech mein thoda T.P. hua aur dekhte hi dekhte evening ho gayi.
Waise office mein hum log market session ke baad hi properly baatein karte hain. Around 4 baje ke baad sab thoda relax ho jate hain. ✨Aaj meri colleague bhi jaldi office se nikal gayi thi. Woh Indore ja rahi thi apni family se milne. Ticket confirm nahi hui thi aur poora din stress mein thi.Uski struggle dekh kar mujhe lagta hai ki meri problems shayad utni badi bhi nahi hain. Thoda sa intro deti hu uska... Woh 29 years ki hai aur abhi tak unmarried hai. Lekin responsibilities kisi shaadi-shuda insaan se bhi zyada hain. Uske nana-nani 80+ age ke hain aur unki poori care wahi karti hai. Hospital ke chakkar, medicines aur har choti badi responsibility.
Uski family story bhi kaafi painful hai.Kabhi kabhi jab woh mujhe apni life ke baare mein batati hai na, toh lagta hai ki Allah ne mujhe bahut si cheezon mein kitna protect karke rakha hai.Dil se dua hai ki usko general coach mein hi sahi, lekin jagah mil gayi ho. 🤲❤️
Office khatam karke mai market gayi ek dupatta dekhne.Lekin jaisa mujhe chahiye tha, waisa ek bhi nahi mila.Aur phir dekhte hi dekhte iftaar ka waqt ho gaya.Mai seedha ghar ki taraf bhaagi.Jaldi se wazu kiya, dupatta set kiya, hijab pehna aur dua padhne baith gayi. ✨Iftaar mein bhajiya, green chutney, chana, coke aur shayad aur bhi kuch tha. 😂 Hum sab ne milkar baatein ki, dua ki aur phir roza khola. ❤️Ab mai aur mummy pehle decide kiye ki auto se jayenge. Ek fare mummy dengi aur ek taraf ka mai. Hum dono agree ho gaye aur ussi beech meri Chand ka call aa gaya. 🌙❤️Usne bas Chand Raat wish karne ke liye call kiya tha aur mai usse baat kar hi rahi thi ki mummy bus stop par khadi khadi thodi restless lagne lagi. Hum waha sirf 2 minute hi khade the lekin mujhe laga hum bas time waste kar rahe hain.
Maine Chand se bola ki mai baad mein call karti hu aur phone cut kar diya. Tabhi achanak meri nazar peeche gayi aur maine dekha ki Bus No. 488 humare peeche khadi hai. 😭😂Mai zor se chillayi,"Mummyyyy chalooo bus aa gayi!"Aur phir hum dono almost bhaagte hue bus mein chadhe.Sach kahu toh AC auto mein aaram se baithne se zyada maza uss bus mein aa gaya. 🚌😂
Bus mein mummy ke saath baatein karte karte mere friend Aadi ka call aa gaya.Usne pehle pucha ki mai free hu kya aur maine haan bol diya.Phir usne apna dil halka karna shuru kiya.
Woh theek nahi tha. Office se usse nikal diya gaya tha aur phir kisi tarah wapas rakh liya gaya, lekin uske baad bhi log uski respect nahi kar rahe the. Sirf isliye kyunki usne do din ki leave li thi aur kisi ne uske baare mein kuch galat baat faila di thi.
Mai bas uski baatein sun rahi thi aur ek cheez realize kar rahi thi ki kabhi kabhi life mein hum kuch galat nahi karte phir bhi log hume galat samajh lete hain.
Aur phir lagta hai ki hum khud hi apni life ki band bajwa rahe hain. 😭Mummy chup chaap baithi thi aur mai phone par lagataar baat kar rahi thi.Phir achanak mujhe khud awkward feel hua. Maine socha ki Q ki baat khatam hone se pehle Ammi kuch bol de usse pehle mai khud hi call cut kar deti hu. 😭
Aur maine wahi kiya.Hum tailor ke paas gaye aur kapde pick kiye.Tab tak raat ke 9:03 p.m. ho chuke the aur ghar ke bahut saare kaam abhi bhi baaki the.Lekin meri mummy meri mummy hai. 😌
Auto liya aur guess what? Auto ka fare sirf ₹72 hua aur phir hum seedha ghar jaane ke bajaye bazaar pahunch gaye. 😂Market mein Eid wali bheed dekh kar mera dimaag ghoom raha tha. Mann hi mann mai soch rahi thi,"Mummy ye shopping ek week pehle bhi kar sakti thi..." 😭Lekin nahi. Aaj hi poori Mumbai ko bazaar aana tha aur mummy ko bhi. Humne dry fruits aur sevaiyaan li aur honestly mujhe itni bheed mein shopping karna bilkul pasand nahi. Phir mai beauty shop gayi aur face scrub, face pack aur moisturizer kharid liya. Aur mummy ke paise se beauty products lena alag hi level ki happiness hoti hai. 😂
Ghar pahunchte hi pata hi nahi chala time kaise nikal gaya.Maine phir se Chand ko call kiya aur apni saari dresses dikhayi.Lekin sach kahu toh dress dikhana bas ek bahana tha.Actually mera mann thoda bhara bhara sa lag raha tha. 🥹Reason bhi nahi pata tha. Bas dil ajeeb sa feel kar raha tha. Kabhi kabhi emotions ki koi wajah nahi hoti, bas woh hote hain.
Lekin side by side mai poori koshish kar rahi thi ki Eid ko enjoy karu. Maine apne haathon mein mehndi lagayi. 🤎✨ Golu ke haath mein phone diya aur phir reels scroll karte karte pata hi nahi chala kab neend aa gayi. 😭😂Kal pakka Fajr ke waqt uthungi...
Inshallah. 🤲🌅
Aur haan, ek cheez batana toh mai almost bhool hi gayi.Aaj humare neighbour office mein ek ladke ka birthday tha aur itna yummy cake aaya tha na... 🎂🤤Sab mujhe chidhane lage ki mai cake nahi khayungi kyunki sabko pata hai sweets mai 2-3 bites ke baad surrender kar deti hu. 😭😂Lekin phir bhi unhone mere liye cake pack kar diya aur strictly warning bhi di,"Bag mein mat rakhna warna 100% yahi reh jayega." 😂
Sach bolu toh office wale meri bahut care karte hain aur mujhe ye choti choti cheezein bahut special feel karwate hain. ❤️
Aur haan...
Maine woh cake iftaar mein khaya.Aur believe me...Aaj ka iftaar uss cake ki wajah se aur bhi zyada mazedaar lag raha tha. 🍰✨Aaj poore din mai bas ek hi cheez consciously try kar rahi thi...Khush rehna.
Har situation mein.
Har mood mein.
Aur har uss cheez ke saath jo mere control mein nahi hai.
Abhi seekh rahi hu... Lekin koshish jaari hai. 🤍
Sukr Allah Always. 💜
Alhamdulillah. 🤲
- Safarnama ✨
wah kitna detailed likhi ho✨️
ReplyDelete